《獅子是這樣練成的》
自從有計劃來年去一次長旅行之後，家中既緊張大師又無間斷出動。去旅行，跟團咪好囉，再唔係同朋友一齊去，自己一個去死左都無人知架。認真，再聽到呢幾句我真心會燥。
跟團呢d就留反我80歲先討論啦，至於相約去旅行我就有小小偉論想發表。
細心唸下，自畢業之後你有幾耐無同成班朋友齊人聚過。約到要生要死都總係有一兩個約左去二度空間。去旅行？唔好講笑啦。人大左，發現世界上有太多太多「現實」根本唔到我地去話事。出黎做野，首先你要有假，之後你要你朋友有假，之後再想搶到平機票，之後重想無人放飛機。成個過程包保緊張過坐過山車。可能你覺得我悲觀，但與其搞禁多野，我寧願成件事係： 在一個風和日麗的下午，我懶洋洋的攤在床上滑著手機，然後我看到那裡正在進行機票促銷，12小時後，我便浸淫於布吉的陽光與海灘之中⋯成件事即卡浪漫N倍。
當然自己去旅行，個期唔使就人，行程隨心呢d就唔使講啦。但無可否認，旅途入面既開心無得share又難免夜晚會覺得有d凍。然而一個人既旅行去耐左，我發現我更喜歡果個識得享受寂寞既自己。
有一句說話我好努力去記住: Ask not what others can do for you, ask what you can do for yourself. 可能我太好勝又太倔強，從來最憎欠人野，亦最討厭自己因為其他人實踐唔到既承諾唔開心。所以每一次我都提醒自己，要努力去做一個會令自己開心既人，要任性要衝動都好，就只要承擔，只要無愧於心。
如果你依家有一班令你好安心既旅伴，請你好好享受呢份甜蜜；如果你正在等待，請你好好珍惜呢種甘苦。但無論如何，你都要記住呢個世界無人係奉旨對你好，自己既快樂，永遠係自己手入面。
Believe in yourself, you always deserve better.
Search